Gen 45 | NdeIBE | STEP | UJosefa wehluleka ukuzibamba phambi kwazo zonke izinceku zakhe, wasememeza wathi, “Sukani lonke lapha kimi!” Ngakho kakho owayekhona loJosefa lapho eziveza kubafowabo.

Genesis 45

UJosefa Uyaziveza

1 UJosefa wehluleka ukuzibamba phambi kwazo zonke izinceku zakhe, wasememeza wathi, “Sukani lonke lapha kimi!” Ngakho kakho owayekhona loJosefa lapho eziveza kubafowabo.

2 Wakhala waphumisela waze wezwiwa ngamaGibhithe, labendlu kaFaro bezwa ngalokho.

3 UJosefa wathi kubafowabo, “Mina nginguJosefa! Kambe ubaba usaphila na?” Kodwa abafowabo behluleka ukumphendula ngokuba besaba kakhulu bephambi kwakhe.

4 UJosefa wasesithi kubafowabo, “Sondelani kimi.” Bathi sebekwenzile lokho wathi, “Ngingumfowenu uJosefa, yena lowo elamthengisela eGibhithe! 5 Kodwa manje lingakhathazeki njalo lingaze lazizondela ngenxa yokungithengisa lapha, ngokuba kwakuyikusiza imiphefumulo ukuba uNkulunkulu angithume ngaphambi kwenu.

6 Sekube yiminyaka emibili manje indlala ikhona elizweni, njalo okweminyaka emihlanu ezayo kakukuba lakulima, lakuvuna. 7 Kodwa uNkulunkulu wangithuma phambi kwenu ukuba alilombele insalela emhlabeni njalo aphephise izimpilo zenu ngokukhulula okukhulu.

8 “Yikho-ke, kwakungasini elangithuma lapha, kodwa nguNkulunkulu. Wangenza ngaba ngubaba kuFaro, lenkosi yomuzi wakhe wonke kanye lombusi weGibhithe lonke. 9 Manje, phangisani liye kubaba lithi kuye, ‘Nanku indodana yakho uJosefa akutshoyo: UNkulunkulu usengenze ngaba yinkosi yalo lonke eleGibhithe. Yehla uze kimi; ungalibali.

10 Uzahlala esigodini saseGosheni ube seduze lami – wena, labantwabakho, labazukulu bakho; lemihlambi yakho yezimvu leyezinkomo lakho konke olakho. 11 Ngizakunakekela ukhonapho ngokuba kuseza eminye iminyaka emihlanu yendlala. Kungenjalo wena lomuzi wakho, labo bonke abangabakho lizahawukelwa.’

12 “Liyazibonela ngokwenu, njengoba lomnawami uBhenjamini ebona, ukuthi yimi mina ngeqiniso engikhuluma lani. 13 Limtshele ubaba ngalo lonke udumo engiluphiwayo eGibhithe langakho konke elikubonileyo. Ubaba limlethe ngokuphangisa lapha.”

14 Wasegona umnawakhe uBhenjamini, wakhala, loBhenjamini wamgona ekhala.

15 Njalo wabanga bonke abafowabo ekhala kulowo lalowo. Ngemva kwalokho abafowabo baxoxa laye.

16 Kwathi ukuba izindaba zifike esigodlweni sikaFaro ukuthi abafowabo bakaJosefa babefikile, uFaro lezikhulu zakhe bathokoza.

17 UFaro wathi, kuJosefa, “Tshela abafowenu uthi, ‘Yenzani lokhu: Thwalisani izinyamazana zenu libuyele elizweni laseKhenani,

18 beselibuya loyihlo kanye lemizi yenu kimi. Ngizalipha umhlaba omuhle okudlulayo lapha eGibhithe, likholise amanono elizwe.’

19 “Uyaqondiswa njalo ukuthi ubatshele uthi, ‘Yenzani lokhu: Thathani izinqola ezithile lapha eGibhithe lisenzela abantwabenu, labomkenu, lithathe uyihlo lize laye. 20 Lingazihluphi ngezimpahla zenu ngokuba okuhle konke kwaseGibhithe kuzakuba ngokwenu.’ ”

21 Ngakho amadodana ka-Israyeli akwenza lokhu. UJosefa wabapha izinqola, njengokulaya kukaFaro, wabuye wabapha umphako wendlela.

22 Ngulowo lalowo wamupha izigqoko ezintsha, kodwa uBhenjamini wamupha amashekeli esiliva angamakhulu amathathu kanye lezigqoko ezinhlanu. 23 Njalo nanku akuphathisela uyise: obabhemi abalitshumi bethwele konke okuhle kwaseGibhithe, labobabhemi abasikazi abalitshumi bebhensiswa ngamabele lesinkwa lokunye okomphako wakhe wendlela. 24 Yikho wasevalelisa abafowabo, bathi sebesuka wathi kubo, “Lingaxabani endleleni!”

25 Ngakho basuka baphuma eGibhithe bayafika kuyise uJakhobe elizweni laseKhenani.

26 Bamtshela bathi, “UJosefa ulokhu ephila! Isibili ungumbusi walo lonke elaseGibhithe.” UJakhobe waphela amandla; kazange abakholwe. 27 Kodwa kwathi lapho sebemtshelile konke uJosefa ayekutshilo kubo, njalo esebone izinqola uJosefa ayethe zizomthwala zimlethe, umoya kayise uJakhobe wavuseleleka.

28 U-Israyeli wathi, “Sengisuthisekile! Indodana yami uJosefa isaphila. Ngizahamba ngiyeyibona ngingakafi.”